தமிழர்கள் பலர் படுகொலை

இன்றும் நேற்றும் (சனி, ஞாயிறு) தமிழர்கள் பலர் சிறிலங்கா அரசபடையினராலும் துணைக்குழுக்களாலும் யாழ்ப்பாணத்தில் படுகொலை செய்யப்பட்டுள்ளனர். "யாழ். தீவகம் மண்டைதீவு அல்லைப்பிட்டிப் பகுதியில் சிறிலங்கா கடற்படையினர் நடத்திய கொடூரத் தாக்குதலில் 2 குழந்தைகள் உட்பட 9 அப்பாவி பொதுமக்கள் படுகொலை செய்யப்பட்டுள்ளனர். யாழிலிருந்து தீவகத்துக்கு செல்லும் மார்க்கத்தில் மண்டைதீவுக்கு அடுத்துள்ள வேலணையின் அல்லைப்பிட்டி கிராமத்தில் 2 ஆம் வட்டாரத்தில் உள்ள மாடி வீடு ஒன்றில் இந்த கொலை வெறியாட்டம் நடத்தப்பட்டது. கறுப்புத்துணியால் முகத்தை மூடியபடி துப்பாக்கிகள் சகிதம் நேற்று சனிக்கிழமை இரவு 8.30 மணியளவில் சென்ற சிறிலங்கா கடற்படையினரும் துணை இராணுவக்குழுவினரும் வீட்டிற்குள் அதிரடியாக நுழைந்தனர். வீட்டின் அறைகள் ஒவ்வொன்றையும் தேடி அங்கு இருந்த ஒவ்வொருவரையும் துப்பாக்கியால் சுட்டனர். நான்கு மாதக்குழந்தையும் இந்த கொலை வெறியாட்டத்தில் சுட்டுப்படுகொலை செய்யப்பட்டது. வீடு முழுவதும் படையினரின் கொலை வெறியாட்டத்தில் இரத்த வெள்ளமானது. சம்பவம் நடந்த வீட்டிலிருந்து 100 மீற்றர் தொலைவில் சிறிலங்கா கடற்படையின் பாரிய முகாம் உள்ளது. கொலை நடைபெற்ற பகுதி படையினரின் உயர்பாதுகாப்பு வலயமாகவுள்ளது. கொல்லப்பட்டோர் விவரம்: மூன்று பிள்ளைகளின் தந்தையான ஏபிரகாம் றொபின்சன் (வயது 28) ஒரு பிள்ளையின் தந்தையான செல்லத்துரை அமுதாஸ் (வயது 28) பாலச்சாமி கேதீஸ்வரன் (வயது 25) பாலச்சாமி கேதீஸ்வரனின் மனைவி அனஸ்எஸ்த்தர் (வயது 25) பாலச்சாமி அனஸ்எஸ்த்தர் தம்பதிகளின் மகன் தனுஸ்காந் (வயது 04), மகள் யதுசா ( 04 மாதம்) நான்கு பிள்ளைகளின் தந்தையான கணேஸ் நவரத்தினம் (வயது 50) ஐந்து பிள்ளைகளின் தந்தையான யோசப் அந்தோனிமுத்து (வயது 64) வர்த்தகர் சிவநேசன் (வயது 56) காயமடைந்தோர் விவரம்: எஸ்.மோகனாம்பிகை (வயது 46) கொல்லப்பட்ட வர்த்தகர் சிவநேசனின் மனைவியான அம்பிகாபதி (வயது 38) ரி.செல்லத்துரை (வயது 61)" ****************************** "யாழ். ஊர்காவற்றுறை புளியங்கூடலில் சிறிலங்கா இராணுவம் மற்றும் அதனுடன் சேர்ந்தியங்கும் துணை இராணுவக் குழுவினரால் மேலும் 4 பேர் படுகொலை செய்யப்பட்டுள்ளனர். ஊர்காவற்றுறை புளியங்கூடலில் ஒரே குடும்பத்தைச் சேர்ந்த 3 பேர் சனிக்கிழமை இரவு 10.30 மணியளவில் படுகொலை செய்யப்பட்டனர். சிங்கள கடற்படையின் இந்த கொடூர கொலை வெறியாட்டத்தில முருகேசு சண்முகலிங்கம் (வயது 72), அவரது மகன் சண்முகலிங்கம் காந்தரூபன் (வயது 29) மற்றும் அவரது மனைவி சண்முகலிங்கம் பரமேஸ்வரி ஆகியோர் படுகொலை செய்யப்பட்டவர்கள் என தெரியவந்துள்ளது. சண்முகலிங்கத்தின் வீட்டுக்குள் நுழைந்த ஆயுதக் கும்பல் கண்மூடித்தனமாக வீட்டில் இருந்தவர்களை நோக்கிச் சுட்டதில் அனைவரும் சம்பவ இடத்திலேயே பலியாயினர். நடராசா வித்தியாலயம் அருகே சண்முகலிங்கம் நடத்தி வந்த தொலைத் தொடர்பு நிலையத்தையும் ஆயுதக் கும்பல் குண்டு வீசி அழித்துள்ளது. மேலும் வங்களாவடிச் சந்தி அருகே தேநீர் கடை உரிமையாளரான இரட்ணம் செந்தூரன் (வயது 22) என்பவரும் படுகொலை செய்யப்பட்டுள்ளார். அப்பகுதியில் எரிபொருள் நிரப்பு நிலையம் ஒன்றும் தாக்குதலுக்குள்ளானது. மேலும் ஊர்க்காவற்றுறையில் புளியங்கூடல் சந்திப் பகுதியில் நேற்று சனிக்கிழமை இரவு ஆயுத கும்பல் ஒன்று பல கடைகளைத் தீக்கிரையாக்கி அப்பகுதி மின்மாற்றி ஒன்றையும் தகர்த்துள்ளனர். " ****************************** இவற்றைவிட நாட்டின் ஏனைய பகுதிகளிலும் தமிழர்கள் கோரமாகப் படுகொலை செய்யப்படுகிறார்கள். கொழும்பில் அண்மையில் 5 தமிழர்களின் உடல்கள் தலையில்லாமற் கண்டுபிடிக்கப்பட்டன. அவ்வுடல்கள் பின்னர் அடையாளங்காணப்பட்டு உறுதிப்படுத்தப்பட்டன. ஆனாலும் அது பெரிய பிரச்சினையாக வெளிவரவேயில்லை. ஒருநாட்டின் தலைநகரில் நடந்த இப்படுகொலைகள்கூட யாரையும் சலனப்படுத்தவில்லை. கிழக்கில் நாளாந்தம் படுகொலைகள் நடத்தப்படுகின்றன. இதில் ஜிகாத் குழுவும் சம்பந்தப்பட்டுள்ளதாகத் தெரிவிக்கப்படுகிறது. இதைவிட சிலநாட்களின் முன் தென்மராட்சிப் பகுதியில் பாடசாலை ஆசிரியர் ஒருவர் உட்பட 7 பேரை இராணுவத்தினர் கைது செய்திருந்ததும், இன்றுவரை அவர்களுக்கு என்ன நடந்ததென்று தெரியாமலுள்ளதும் குறிப்பிடத்தக்கது. அப்பகுதி மக்கள் அவர்களைப் படையினர் சுட்டுக்கொன்றதாகச் சொல்கின்றனர். கைது செய்ததை ஒத்துக்கொண்ட படையினர் இதுவரை அவர்களுக்கான முடிவை அறிவிக்கவில்லை. உடலங்கள் கிடப்பதாகச் சொல்லப்பட்ட பகுதிக்குள்ள மக்களைப் புகவிடாமல் இராணுவம் காவல்காத்ததும் 30 மணித்தியாலங்களின்பின்பே கண்காணிப்புக்குழு இடத்துக்கு வந்து பார்த்துவிட்டு எந்தச் சடலங்களுமில்லையென்று சொல்லவிட்டுச் சென்றதும் குறிப்பிடத்தக்ககது. முன்பு இராணுவத்தால் கைதுசெய்யப்பட்டு காணாமற்போன எழுநூறுபேர்வரையானோரின் நிலை ஆண்டுக்கணக்காகத் தெரியவரவில்லை. இதேவேளை நேற்று முன்தினம் யாழ்ப்பாணத்தில் சர்வதேச தமிழ்மாணவர் பேரவையினரின் அலுவலகமும் சொத்துக்களும் படையினரால் எரியூட்டி அழிக்கப்பட்டன. நாற்பது வரையான கணிணிகள், பல்கலைக்கழக நூலகத்துக்கான இரண்டாயிரம் புத்தகங்கள் என்பவற்றுடன் அவ்வீடும் எரிக்கப்பட்டுள்ளது. இது நடந்தது இலங்கைப் பாராளுமன்ற உறுப்பினரான கஜேந்திரனின் அலுவலகத்திலும் அதனுடனிணைந்த கட்டடத்திலும். நாட்டின் பாராளுமன்ற உறுப்பினரின் அலுவலகத்துக்கே இந்த நிலைமை. ******************************** வெறிபிடித்தது போன்ற மனநிலையில் சிங்களப்படைகள் செயற்படுகின்றன. இந்நிலையில் புலிகள் என்ன செய்யப்போகிறார்கள்? மக்களின் பிரதிநிதிகள் என்றவகையில் அவர்கள் நிச்சயம் ஒரு முடிவு எடுக்க வேண்டும். இந்தநிலையில் 1999 செப்ரெம்பர் நடத்தப்பட்ட மந்துவில் -கோணாகல படுகொலைகளும் அதைத்தொடந்து சில ஆண்டுகள் (அண்மையில் நடத்தப்பட்ட திருகோணமலை வான்வழித்தாக்குதல் வரை) தமிழ்மக்கள் மேல் வான்வழிப்படுகொலைகள் நடத்தப்படாமலிருந்ததும் ஞாபகம் வந்து தொலைக்கிறது. ********************************* படுகொலை செய்யப்பட்டோரின் படங்களைப் பார்க்கலாம். இளகிய மனம் படைத்தோர் பார்க்க வேண்டாம். குறிப்பாக குழந்தைகள், சிறுவர்கள் பார்க்க வேண்டாம். படங்கள். நன்றி: புதினம், தமிழ்நெற், நிதர்சனம்.